記得細個寫過一篇作文,寫嫲嫲嘅.
第一句就話:這些年來,我和奶奶相依為命.
依家諗返起咁寫唔多啱,會俾人以為我無老豆老母,
但係我記得將作文拿返去俾嫲嫲睇之后,佢睇完第一句,佢即刻有眼淚...
跟住捉住我黎錫.
然后話:講得好!

我嫌嫲嫲煮餸單調,十幾年日日嘅餸都差唔多.
自從我鍾意食番茄,日日都有番茄;
自從我鍾意食青椒,日日都有青椒.
餐餐都有番茄煮蛋或者青椒炒牛肉,好餸嗰日就兩樣都有.
食咗十幾年.就算依家返到屋企都一樣.
其實我都係是但嫌下,因為都唔係真係咁難食.

嫲嫲真係好身體.
佢拿住十斤米同餸都可以一口氣上6層樓.
爬山落山仲快過D后生嘅.
但係佢真係老了,我知道.
每次返去都見到佢係老咗...染髮染得幾勤力都睇得出...(佢聽到會唔會好hurt?)
老咗,身體一定會差咗.但係大家都無視依一點...
"無事嘅,佢血壓仲正常過我~"我老豆話.
真係咁咩?身體咁好點解會自己眼花暈暈下坐喺廳個地下?
屋企無人,佢又聾.

嫲嫲成日話好想我快D出黎做嘢,搵錢請佢去飲茶,唔駛旨意老豆.
佢成日都講,每次我返去都講,證明佢真係好想.
嗰種渴望嘅語氣同神態令到我好驚.
點解要咁趕?嫲嫲妳身體咁好,慢慢都未遲啦...
原來我係驚.
驚D乜?

以前返學,早上落咗樓,嫲嫲會喺窗邊望落黎同我講拜拜.
我成日放學好耐先返到屋企,佢就會坐喺窗邊一直望住街口,
我一入門佢就話:妳返黎啦?我望穿雙眼啦!
依個時候我覺得嫲嫲好好文采.

嫲嫲其實係一個好煩嘅大人,
好煩好煩....唔可以用三言兩語形容,
反正就係時刻挑戰我嘅耐性.

最近,自從我去咗第度讀書,每次我返去佢都會同我講:
"我好煩啊,無人同我講嘢,一日到黑都得我一個人,好悶啊,我真係抑鬱症啦!..."(下省萬字)
我坐喺沙發左耳聽佢講,右耳聽電視,唔知幾時開始就走神唔知佢up乜了,
"喂,妳有無聽我講嘢架?我講咁多,喂!聽唔聽到啊?!"
我回過神,望住佢,眼神茫然.其實我有聽...有聽重點.
好明白嫲嫲,一個人,對住咁大間屋,milkmilk又去咗,無人陪佢...
夜媽媽嗰陣,一個老人,坐喺冷冰冰嘅屋度睇電視,自己一個,
起身,做運動,煮飯,食飯,打盹,睇電視,刷牙,訓覺,全部一個人.
聲帶都發毛.

我細細個就同嫲嫲一齊,佢照顧我一切,睇住頭家.
佢依家希望我賺前請佢飲茶,
我做唔到,
佢一個人好悶想有人陪,
我陪唔到,
佢身體唔知好唔好,
我監視唔到,
我好驚,好驚好似個夢咁無機會.
嗰種后悔,我喺個夢度都感覺得好清楚好清楚.
啋~~~~~~嫲嫲身體健康!

尋日,我強烈不安底下打電話問老豆嫲嫲身體點,
佢見我咁緊張就問我咩事,
我話無,
佢問我係唔係夢到D乜,
我話咁你都估到,係啊.
佢壓低把聲話:前兩日(我發夢嗰晚),嫲嫲個細佬去咗...
哇.....好凍....